عجبي عليك يا زمن

Reem الخميس أبريل 23, 2009 5:21 pm

عجبى عليك يازمن مالكش عزيز ولا غالى
كيف شفت قلبى والنبى يا طبيب
هَمَد ومات والا سامع له دبيب
قاللى لقيته مختنق بالدموع
ومالوش دوا غير لمسه من إيد حبيب

عجبى

دخل الربيع يضحك لقانى حزين
نده الربيع على إسمى لم قلت مين
حط الربيع أزهاره جنبى وراح
وإيش تعمل الأزهار للمَيتين
عجبى

الدنيا من غير الربيع ميّته
ورقة شجر ضعفانة ومفتته
- لأ يا جدع غلطان تأمّل وشوف
زهر الشتا طالع فى عز الشتا
عجبى

نظرت فى الملكوت كتير وانشغلت
وبكل كلمة ( ليه ؟) و ( عشانيه ) سألت
اسأل سؤال ... الرد يرجع سؤال
واخرج وحيرتى أشد مما دخلت
عجبى

لا تجبر الإنسان ولا تخيّره
يكفيه ما فيه من عقل بيحيَّره
اللى النهارده بيطلبه ويشتهيه
هو اللى بكره ح يشتهى يغيّره
عجبى

قالوا الشقيق بيمص دم الشقيق
والناس ما هيَّاش ناس بحق وحقيق
قلبى رميته وجبت غيره حجر
داب الحجر .. ورجعت قلبى رقيق
عجبى

ليه يا حبيبتى ما بيننا دايماً سفر
ده البعد ذنب كبير لا يغتفر
ليه يا حبيبتى ما بيننا دايماً بحور
أعدى بحر ألاقى غيره اتحفر
عجبى

الفيلسوف قاعد يفكر سِيبوه
لا تعملوه سلطان ولا تصلبوه
ما تعرفوش إن الفلاسفة ياهوه
اللى يقولوه بيرجعوا يكدّبوه ؟
عجبى

بين موت وموت ... بين النيران والنيران
ع الحبل ماشيين الشجاع والجبان
عجبى عَلادى حياة .. وياللعجب
إزاى أنا ـ يا تخين ـ بقيت بهلوان
عجبى

عينى رأَت مولود على كتف أُمه
يصرُخ تهنِّن فيه يصرخ تضمُّه
يصرخ تقول يا بْنى ما تنطق كلام
ده اللى ما يتكلمش يا كتر همُّه
عجبى

بلياتشو قال إيه بس فايدة فنونى ؟
وتلات وقق مساحيق بيلوّنونى
والطبل والمزمامير وكتر الجعير
إذا كان جنون زبونى زاد عن جنونى
عجبى

قالوا السياسة مهلكة بشكل عام
وبحورها يا بنى خشنة مش ريش نعام
غوص فيها تلقى الغرقانين كلهم
شايلين غنايم . والخفيف اللى عام
عجبى

قطى العزيز راقد على الكنبات
فى نوم لذيذ .. وبيلحس الشنبات
وانا كلّ عين فنجان مدلدق قلق
صدق اللى قال إن الحياة منابات
عجبى

ولدى إليك بدل البالون ميت بالون
انفخ وطرقع فيه على كل لون
عساك تشوف بعنيك مصير الرجال
المنفوخين فى السترة والبنطلون
عجبى

زحام وأبواق سيارات مزعجة
إللى يطول له رصيف .. يبقى نجا
لو كنت جنبى يا حبيبى أنا
مش كنت أشوف إن الحياة مُبهجة ؟
عجبى

ياللى انت بيتك قش مفروش بريش
تقوى عليه الريح . يصبح مفيش
عجبى عليك حواليك مخالب كبار
وما لكش غير منقار وقادر تعيش
عجبى

ولدى نصحتك لما صوت اتَنَبح
ما تخافش من جِنِّى ولا من شَبَح
وإن هبّ فيك عفريت قتيل إسأَله
ما دافعش ليه عن نفسه يوم ما اندبح ؟
عجبى

مع إن كل الخلق من أصل طين
وكلهـم بينــزلوا مْغَمَّضـيـن
بعد الدقايق والشهور والسنين
تلاقى ناس أَشرار وناس طيبين
عجبى

رائعة من روائع الفنان : صلاح جاهين